Musikalischi Summersprosse

«Musikalischi Summersprosse»

SOMMERKONZERTE
IM KANNENFELD-PARK
In der Arena beim oberen Park-Eingang (Burgfelderstrasse)

Musikalischi Summersprosse
Hauptseite
Geschichte
Konzerte
Sponsoren
Bilder
Team

Hauptseite
Geschichte
Konzerte
Sponsoren
Bilder
Team

Gschicht vo de „Musikalische Summersprosse“

Scho in de 90er-Johr haan y im ene so scheenen und ideale Gaarte vom doozmoolige Domizyl vo der „Sehbehinderte-Hilf Basel“ im Summer „Sehveegeli-Serenade“ under em Motto „Musikalischi Summersprosse“ organisiert! Dangg em freywillige Ussdritt vo de vyyle BsuecherInne und Bsuecher, em Entgeegekoo vo de MuusiggerInne und Muusiger, em ehrenamtlige Yysatz vo alle Hälferinnne und Hälfer isch jeedes Johr e hailoos erfrailige Bedraag zu Gunschte vo sehbehinderte Mensche zämmekoo!

Dass in Basel in de Summerferie, also zwische „Summerblues im Glaibasel“ und em „Em Bebbi sy Jazz“ au s niiderschwellige „Muusig fir Alli“-Aagebot brach ligt, het mii bewooge mit Understitzig vo liebe Frindinne und Frinde die Konzärtraihe wiiderzbelääbe! Dooderby haan y allewyl die laider fascht nit gnutzti aber soo ideali Freyliecht-Arena im Kannefäldpargg im Aug kaa!
Bii myner schyych Aafroog bim Stadtgärtner Emanuel Trueb biin y erfrailigerwys und fir mii au nit iiberraschend uff offeni Ohre bzw. Diire gstoosse. Är het mir spontan d (die meegligi) Understizig vo Ihm und syne Lyt zuegsait!
S Konzäpt isch meh oder weeniger glych bliibe, usser dass mir, doos jo kaini Wohltätigkaits- sondere Summeferie-Oobekonzärt fir die „Dehaimbliibene“ sinn weeder Yydritt noo Ussdritt verlange!
Sicher au e Grund, dass mir unseri Konzärt-Raihe nit „Festival“ nenne, nai es selle fir Grooss und Glai, also fir d Lyt uss der Region ungezwungeni Summeroobe-Konzärt sy! Me gniesst d Konzärt mit em mitbrochte Picknick oder kauft ebis am Gdrängge- und Imbiss-Stand!
S erschte Konzärt het im 2012 stattgfunde. In der Pandemiezyt hänn mir s nadyrlig an die berächtigte stränge„Spiilreegle“ ghalte!
Drotzdämm mir in dääne vyyle Johr no nie e „Lärm“-Regglamation bikoo hänn, het der Amtsschimmel unseri Konzärtzyte wäägem Muusig-„Läärm“ vor drey Johr welle beschnyde! Dangg ere Petition, die hailoos rasch z Stand koo isch, isch der Groossi Root em aistimmige Adraag vo der Petitions-Kommission erfrailigwys gfolgt!
Nadyrlig isch dää Entschaid nid numme vo uns, sondere au vo unsere vyyle Gescht mit groosser Gnuegtueig uffgnoh woorde!
Aprpos vyyle Gescht; s lescht Johr isch die so ideali Arena im Kannefäldpargg allewyl maischtens voll gsii. Daas het nadyrlig e neye BsuecherInne-Rekord bedytet! Und waas uns au no bsunders gfrait het, isch, dass allewyl meh Famylie unseri Konzärt bsueche!
Mir fraien is hailoos, wenn au Sii daas Johr unseri „Musikalische Summersprosse“-Konzärt bsueche und wintschen Ihne jetzt scho vyyl Vergniege.

Im Namme vo der ehrenamtlige Arbetsgrubbe
Ärnscht Mutschler